26 aprel 2024-cü il tarixində saat 10.00-da Psixologiya kafedrasının "Uşaq və yaş psixologiyası" ixtisaslaşması üzrə II kurs magistrant Əhmədova Solmaz Tərlan qızının “Kiçik yaşlı məktəblilərdə adaptasiyanın inkişaf dinamikası” və "Ümumi psixologiya" ixtisaslaşması üzrə qiyabi doktorant Cəfərova Şəbnəm Şirvan qızının “Xarici dil öyrənmədə diqqət, anlama və fərq etmənin rolu ilə bağlı nəzəriyyələr” mövzusunda onlayn formada Microsoft Teams proqramında elmi seminarları keçirilib.
Seminarda kafedranın professor-müəllim heyəti, doktorantlar, magistrantlar iştirak edib. Əvvəlcə kafedranın "Uşaq və yaş psixologiyası" ixtisaslaşması üzrə II kurs magistrantı Əhmədova Solmaz Tərlan qızı “Kiçik yaşlı məktəblilərdə adaptasiyanın inkişaf dinamikası” mövzusu ilə çıxış edib. Mövzu kiçik yaşlı məktəblilərin dörd il ərzində psixoloji və sosial cəhətdən inkişaf mərhələsindən keçməkləri ilə başlanır. İbtidai sinifdə olan uşaqların 1-4-cü siniflərdən böyüdükcə inkişafında əsas məsələləri qısa şəkildə tərtib olunub. Burada kiçik yaşlı şagirdlərin uğurlu adaptasiyasına hansı müxtəlif amillər təsir göstərdiyi vurğulanıb. Beləliklə, ibtidai məktəb yaşı uşaqlıq dövrünün ən mühüm mərhələsidir. Bu yaşı tam yaşamaq, uşağın gələcək inkişafının fəal idrak və fəaliyyət subyekti kimi qurulması üçün zəruri əsasdır.
Daha sonra seminarda Psixologiya kafedrasının "Ümumi psixologiya" ixtisaslaşması üzrə qiyabi doktorantı Cəfərova Şəbnəm Şirvan qızı “Xarici dil öyrənmədə diqqət, anlama və fərq etmənin rolu ilə bağlı nəzəriyyələr” mövzusunda çıxış edib. Araşdırmada diqqət, anlama (məlumatlılıq) və fərq etmənin (sezmənin) xarici dil öyrənmədə rolu və əhəmiyyəti nəzəri və emprik cəhətdən tədqiq edilib. Müxtəlif tədqiqatlardan əldə edilmiş məlumatlardan belə nəticəyə gəlmək olar ki, öyrənənin hər hansı bir ikinci xarici dil öyrənərkən diqqət , fərq etmə böyük əhəmiyyətə malikdir və bunlar olmadan ikinci xarici dili mənimsəmək və ya inkişaf etdirmək olduqca çətin məsələlərdən birinə çevrilir.
Magistrant və doktorantın çıxışından sonra müzakirələr edilib, mövzu ilə bağlı kafedranın professor-müəllim heyəti tərəfindən fəaliyyətin gələcək perspektivləri ilə bağlı təklif və tövsiyələr verilib.