Fəlsəfə kafedrasında elmi seminar keçirilib
Fəlsəfə kafedrasında növbəti elmi seminar keçirilib. Seminarı kafedra müdiri, dosent Kəmalə Pənahova açaraq bildirib ki, təbii və sosial elmlərdə gedən sürətli inkişafla bağlı olaraq fəlsəfənin bəzi kateqoriyalarına yeni tərzdə yanaşmaq məqsədə müvafiqdir. Elm inkişaf etdikcə oradakı problemlərin fəlsəfi cəhətdən ümumiləşdirilməsi günün tələblərindəndir. Ona görə də fəlsəfi kateqoriyaların məzmununa dinamik yanaşılmalı, onların yeni tərzdə şərhi tədqiqatlarda və dərsliklərdə öz əksini tapmalıdır.
Məruzəçi professor Əziz Məmmədov “Fəlsəfənin bəzi anlayış və kateqoriyalarına verilən düzəlişlər ” mövzusunda çıxış edərək qeyd edib ki, fəlsəfə müasir elmlər içərisində yalnız öz predmet genişliyi və məzmun zənginliyi ilə deyil, həm də təbii-elmi və sosial elmlərin inkişafı ilə kəsb etdiyi dinamikliyi ilə fərqlənir. Bu dinamiklik özünü fəlsəfənin kateqoriyalarının məzmun cəhətdən zaman-zaman uğradığı dəyişikliklərdə büruzə verir. Əziz Məmmədov fəlsəfənin əsas kateqoriyalarından olan varlıq, materiya, hərəkət, məkan, zaman kateqoriyalarına yeni tərzdə yanaşmalarını seminar iştirakçılarına təqdim edib. Sonra dünyagörüşü və elmdə bilik anlayışlarının məzmununu fərqləndirib.
Sonra kafedrada təqdim olunan problem ətrafında müzakirələr keçirilib. Kafedranın dosentləri Arif Tağıyev və Bilal Əlizadə qoyulan problemlərə öz münasibətlərini bildiriblər.
Sonra kafedranın doktorantı Dinarə Əliyeva “Sosiomədəni dinamikanın səciyyəvi xüsusiyyətləri və müasir dünyada inkişaf tendensiyası” mövzusunda çıxış edib.
Məruzəçi öz çıxışında inkişafın dövrü modeli çərçivəsində sosial-mədəni dinamika mexanizminin işləməsinin izahedici fərziyyəsinin qurulması və keçmiş mədəni modelin tükənməsi problemini ilk dəfə irəli sürənlərdən biri olan rus-amerikan sosioloqu Pitirim Sorokinin fikirlərinə xüsusi diqqət yetirib. Dinarə Əliyeva, həmçinin mədəniyyət anlayışının mahiyyəti, onun predmeti və spesifik xüsusiyyətləri barədə yanaşmalarını bildirib.
Kafedrada qərara alınıb ki, növbəti seminarlarda qeyd olunan məsələ ilə bağlı müzakrə davam etdirilsin.
