Bakı Dövlət Universiteti Sosial elmlər və psixologiya fakültəsi

Bakı Dövlət Universitetinin (BDU) Karyera və məzunlarla iş Mərkəzinin fakültələrdə silsilə tədbirləri davam edir. Tədbirlər Karyera və məzunlarla iş Mərkəzinin fəaliyyəti, tələbə və məzunlara göstərdiyi xidmətlər haqqında məlumatlandırma məqsədi daşıyır. Bu dəfə təqdimat görüşü Sosial elmlər və psixologiya fakültəsində keçirilib. Tədbirdə Sosial elmlər və psixologiya fakültəsinin dekanı Rövşən Cavadov, dekan müavinləri Nəzakət Kərimova və Daxil Vəliyev iştirak edib.  

Tədbir zamanı bildirilib ki, tələbə və məzunların müasir əmək bazarında olan yeniliklərdən xəbərdar edilməsi, gələcəyin vəd etdiyi peşə və bacarıqlarla tanış edilməsi və hazırki tələblərə cavab verən peşəkar kadrların yetişdirilməsi Karyera və məzunlarla iş Mərkəzinin prioritet məqsədlərindəndir. Tələbələrə karyeralarının düzgün  idarə edilməsi (karyera planlaşdırılması), onlarda  xüsusi səriştə və bacarıqların formalaşdırılması, əmək bazarının tələbləri nəzərə alınmaqla onların yeni iş yerləri ilə tanışlığının təmin edilməsi Mərkəzin fəaliyyət istiqamətlərinə daxildir. Qeyd edilib ki, karyera məsləhətçiləri konsultasiyalar, təlimlər, infosessiyalar, workshoplar vasitəsilə düzgün CV və rezyüme yazılması qaydaları, uğurlu karyera planlaşdırılması, işaxtarışı alətləri, müsahibə texnikaları və s. ilə tələbələrin tanışlığını təmin edir.

Sonda tələbələrin sualları cavablandırılıb və xatirə şəkli çəkilib.