Bakı Dövlət Universiteti Sosial elmlər və psixologiya fakültəsi

Bakı Dövlət Universiteti (BDU) Sosial elmlər və psixologiya fakültəsi Psixologiya kafedrasının müəllimi Emiliya İgidova və SABAH qruplarının müəllimi David Poladov məktəb psixoloqları üçün “Məişət zorakılığı və onun qarşısının alınması” mövzusunda təlim təşkil ediblər. Təlim Yasamal rayonu Heydər Əliyev Mərkəzində keçirilib və məktəb psixoloqlarının bu sahədə məlumatlılığını artırmaq məqsədi daşıyıb.

Təlimin nəzəri və praktik hissələri zamanı məişət zorakılığı halları ilə bağlı qanunvericilik və psixoloji müdaxilələr haqqında geniş məlumat verilib. Emiliya İgidova məktəb psixoloqlarının məişət zorakılığı hallarının erkən deteksiyasında və müdaxiləsində oynadığı kritik rolu vurğulayıb. O, psixodiaqnostikanın əsas vasitəsi olan strukturlaşdırılmış və standartlaşdırılmış qiymətləndirmə alətlərindən istifadəni izah edərək uşaqların emosional və davranış dəyişikliklərinin erkən mərhələdə identifikasiyasının vacibliyini qeyd edib. Eyni zamanda, Emiliya İgidova individual fərqləri nəzərə alan diferensial diaqnostika metodlarının tətbiqinin effektiv nəticələrə gətirib çıxardığını vurğulayıb.

David Poladov iştirakçılara uşaqlar və yeniyetmələr üçün psixoloji dəstəyin təşkili sahəsində beynəlxalq yanaşmaların praktik aspektlərini təqdim edib. O, xüsusilə affektiv tənzimləmə, koqnitiv restrukturizasiya və davranış modellərinin dəyişdirilməsində istifadə olunan metodoloji yanaşmaların üstünlüklərini vurğulayıb. Poladov psixoloji yardım prosesində inteqrativ psixoterapevtik yanaşmaların əhəmiyyətini izah edərək sistematik desensitizasiya, emosional transformasiya və metakoqnitiv strategiyaların birgə istifadəsinin psixoterapiyanın effektivliyini artırdığını qeyd edib. Eyni zamanda, o, multiperspektivli diaqnostikanın və interaktiv terapevtik müdaxilələrin emosional sabitlik və psixososial adaptasiya üçün zəruri olduğunu vurğulayıb.

Təlim çərçivəsində iştirakçılar sual-cavab sessiyasında öz suallarını ünvanlayaraq praktiki tövsiyələr əldə ediblər.

Yasamal Rayon İcra Hakimiyyətinin başçısının müavini, İctimai-siyasi və humanitar məsələlər şöbəsinin müdiri Təravət Muradova tədbir iştirakçılarını salamlayaraq, məişət zorakılığı ilə bağlı mövcud vəziyyət barədə məlumat verib.

Daha sonra çıxış edən Dövlət Komitəsinin Hüquqi-təminat Şöbəsinin müdiri Taliyə İbrahimova məişət zorakılığına qarşı mübarizədə məktəb psixoloqlarının məlumatlı olmasının vacibliyini, bu halların aşkar olunmasında, ilkin yardımın edilməsində və operativ olaraq aidiyyəti qurumlara məlumat verilməsində mühüm rolunu qeyd edib.

Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin Bakı şəhəri üzrə Təhsil İdarəsinin müdir müavini Anar Qədiməliyev məişət zorakılığı hallarının aşkar olunması və dərhal müdaxilə edilməsi sahəsində tövsiyələrini diqqətə çatdırıb.