MƏZUNLAR 20 İL SONRA DOĞMA UNİVERSİTETDƏ
Bakı Dövlət Universiteti (BDU) Sosial elmlər və psixologiya fakültəsini Psixologiya ixtisası üzrə bitirmiş bir qrup məzun 20 ildən sonra Azərbaycanın ilk ali təhsil ocağını ziyarət ediblər. 1999-2003-cü illərdə bu ali məktəbdə təhsil almış məzunlar (1478 saylı qrup) hazırda respublikanın müxtəlif şəhər və kəndlərində öz ixtisasları üzrə əmək fəaliyyəti ilə məşğul olurlar. Görüşə Quba, Kürdəmir, Sumqayıtdan gələn məzunlar doğma təhsil ocağını böyük sevinc və qürur hissi ilə gəzib, orada aparılan əsaslı təmir və yenidənqurma işləri ilə tanış olublar.
Bakı Dövlət Universitetinin rektoru Elçin Babayev məzunları yüksək qonaqpərvərliklə qarşılayıb, onlarla söhbətində hazırda psixoloji xidmətə dünyada ciddi tələbat yarandığını qeyd edib. Bakı Dövlət Universitetində ilk dəfə olaraq yaradılan Psixoloji Yardım Sektoru haqqında məzunlara məlumat verən rektor onlara fəaliyyətlərində uğurlar arzulayıb. Sonda rektor Elçin Babayev məzunlarla xatirə şəkli çəkdirib.
Məzunlar 20 il əvvəlki xatirələrin yenidən canlandırılmasının və universitetdə son vaxtlar baş verən yeniliklərin doğurduğu xoş təəssüratlarla, illər sonar yenidən universiteti birlikdə ziyarət etmək arzusu ilə universitetdən və bir-birindən ayrılıblar.
