Bakı Dövlət Universiteti Sosial elmlər və psixologiya fakültəsi

Bakı Dövlət Universitetinin (BDU) Sosial elmlər və psixologiya fakültəsinin müəllim və tələbələri fakültənin şəhid məzunu Cavid Manafovun məzarını ziyarət ediblər.

Sosial elmlər və psixologiya fakültəsinin Sosial məsələlər və tələbələrlə iş üzrə dekan müavini Nəzakət Kərimova, fakültənin Tələbə Həmkarlar İttifaqının sədri Heydər Aslanov və tələbələr C.Manafovun Keşlə Şəhidlər Xiyabanındakı məzarını ziyarət ediblər. Onun məzarı önünə tər gül dəstələri düzüb, xatirəsini ehtiramla yad ediblər. BDU-nun müəllim və tələbələri anım günündə  şəhidin anası Natavan İbrahimova ilə görüşüb, vətənpərvər övlad tərbiyə etdiyinə görə ona minnətdarlıq ediblər. Şəhidin məzarı önündə çıxış edənlər Cavid Manafovun əziz xatirəsinin müəllim və tələbə yoldaşları tərəfindən daim uca tutulduğunu diqqətə çatdırıblar. Bildirilib ki, qürur mənbəyimiz olan şəhidlərimiz yaddaşlarda əbədi yaşayacaq.

Qeyd edək ki, Cavid Manafov Müharibə başladığı gündən Füzuli, Cəbrayıl, Zəngilan və Qubadlı istiqamətində gedən döyüşlərdə iştirak edib. 31 oktyabr 2020-ci il tarixində Batareya komandirini və digər döyüş yoldaşlarını xilas edərkən ağır yaralanıb. 7 noyabr 2020-ci il tarixində şəhid olub. Cavid Manafov 2016-2020-ci illərdə Bakı Dövlət Universitetinin Sosial elmlər və psixologiya fakültəsində təhsil alıb.