Bakı Dövlət Universiteti Sosial elmlər və psixologiya fakültəsi

Bakı Dövlət Universiteti (BDU) Sosial elmlər və psixologiya fakültəsi Tələbə Gənclər Təşkilatının təşəbbüsü ilə "Sözün təsiri və yayılma yolları" mövzusunda tədbir keçirilib. Tədbirin qonağı yazıçı-şair, tanınmış radio aparıcısı Raqif Raufoğlu olub. Sosial elmlər və psixologiya fakültəsinin Sosial məsələlər və tələbələrlə iş üzrə dekan müavini Nəzakət Kərimova tədbiri açıq elan edərək sözü Raqif Raufoğluna verib. Tanınmış radio aparıcısı çıxışında sözün qüdrəti, onun  insan həyatına təsiri məsələlərindən danışıb, sözün təsirini artıran məqamlara - intonasiya, jest, mimika kimi mühüm amillərə diqqət yetirib. O, qeyd edib ki, bəzən sözün mənası və təsiri onun necə deyilməsi, hansı məqamda işlədilməsi ilə sıx bağlı olur. “Biz səsimiz, bədənimizin hərəkətləri, jestlər və sifətimizin ifadəsi ilə danışdığımız sözlərin mənasına xeyli müxtəliflik veririk. İlk baxışdan adi görünən “Salam!” sözü, intonasiyadan asılı olaraq həm həqiqi salamlamaq, həm də hədələmək, qorxutmaq kimi səslənə bilər. Təsadüfi deyildir ki, incəsənət sahəsində professional aktyorlar ən çox intonasiya və bədən hərəkətlərinin dili ilə danışmağa üstünlük verirlər”.

Raufoğlu daha sonra sözlərin magik təsirindən danışaraq qeyd edib ki, söz vasitəsilə insan digərinə böyük xoşbəxtlik də bəxş edə, yaxud onu sonsuz ümidsizliyə sala bilər: “Sözün köməyi ilə müəllim öz biliyini şagirdə ötürür, sözlə natiq auditoriyanı ələ alır, onun fikrini və qərarını müəyyənləşdirir. Söz emosiya yaradır və bütövlükdə o bizim əlimizdə insanlara təsir etmək vasitəsidir”.

Raqif Raufoğlu tədbirin sonunda auditoriyanın ona ünvanladığı suallara cavab verib və tələbələrin xahişi ilə geniş oxucu rəğbəti qazanmış sevgi şeirlərini söyləyib. "Sözün təsiri və yayılma yolları" mövzusunda keçirilən tədbir gənclər tərəfindən maraqla qarşılanıb və sonda tanınmış radio aparıcısı ilə xatirə şəkli çəkilib.