Vətən müharibəsi qəhrəmanı Adil İbrahimlinin anım günü keçirilib
Sosial elmlər və psixologiya fakültəsində Vətən müharibəsi qəhrəmanı Adil İbrahimlinin anım günü münasibəti ilə tədbir keçirilib. Tədbirdə fakültə dekanı Rövşən Cavadov, Sosial məsələlər üzrə dekan müavini Nəzakət Kərimova, Adil İbrahimlinin həyat yoldaşı Nargül İbrahimli və müxtəlif ixtisaslar üzrə təhsil alan tələbələr iştirak ediblər.
Tədbir iştirakçıları öncə Azərbaycanın ərazi bütövlüyü uğrunda qəhrəmancasına həlak olmuş şəhidlərin əziz xatirəsini bir dəqiqəlik sükutla yad ediblər.
Fakültə dekanı Rövşən Cavadov bildirib ki, xalqımız bir qədər əvvəl Zəfər gününü qeyd edib. O, 44 günlük Vətən Müharibəsində bu zəfəri bizə yaşadan qəhrəmanların daim hörmət və sevgi hissləri ilə anılmasının, şəhidlərimizin ailə üzvləri və övladlarına diqqət və qayğı göstərilməsinin zəruriliyini vurğulayıb. R.Cavadov tədbirin Vətən müharibəsində böyük şücaət göstərmiş Adil İbrahimliyə həsr olunduğunu bildirərək onun şanlı döyüş yolu haqqında tələbələrə məlumat verib.
O, qeyd edib ki, Adil İbrahimli Azərbaycanın ərazi bütövlüyünün təmin edilməsi uğrunda döyüş əməliyyatlarına qatılaraq hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirib. Şuşanın azad edilməsi uğrunda gedən döyüşlərdə isə qəhrəmancasına həlak olub. Noyabrın 20-də Bakıda II Şəhidlər Xiyabanında torpağa tapşırılıb. Adil İbrahimli ölümündən sonra “Vətən Müharibəsi Qəhrəmanı” adını layiq görülüb. O, həmçinin "Vətən Uğrunda" , “Kəlbəcərin azad olunmasına görə”, “Xocavəndin azad olunmasına görə”, “Şuşanın azad olunmasına görə” və “Cəbrayılın azad olunmasına görə” medalları ilə təltif olunub.
Tədbirin aparıcısı Fəlsəfə ixtisası üzrə I kurs tələbəsi Rufiz Quluzadə bildirib ki, 2021-ci il sentyabrın 27-də Vətən Müharibəsi zamanı Azərbaycanın ərazi bütövlüyü uğrunda həlak olmuş əsgər və zabitlərimizə, qətlə yetirilən mülki vətəndaşlara və itkin düşmüz soydaşlarımıza ehtiram əlaməti olaraq keçirilən yürüşdə Ali Baş Komandan İlham Əliyev əlində Vətən müharibəsi qəhrəmanı Adil İbrahimlinin şəklini tutub. O, daha sonra qeyd edib ki, Xüsusi Təyinatlı Qüvvələrin baş leytenantı, Vətən Müharibəsi Qəhrəmanı Adil İbrahimlinin həyat yoldaşı Nargül İbrahimli Sosial elmlər və psixologiya fakültəsinin Psixologiya ixtisası üzrə ikinci kurs tələbəsidir. N.İbrahimli həyat yoldaşının anım günü münasibəti ilə təşkil edilmiş tədbirə görə təfakültə rəhbərliyinə öz minnətdarlığını bildirib.
Tədbirdə fakültənin Fəlsəfə ixtisası üzrə IV kurs tələbəsi Səbinə Mirzəməmmədovanın bəstələdiyi “Ağlama, anacan” musiqisi səsləndirilib. II kurs sosiologiya ixtisasının tələbəsi Samir Hacıyev və Təhsildə Sosial Psixoloji xidmət ixtisası üzrə II kurs tələbəsi Sevil Nəsirovanın birgə hazırladıqları “Salam, şəhid anası” adlı videoçarx nümayiş etdirilib.
Sonda Sosial məsələlər üzrə dekan müavini Nəzakət Kərimovanın Vətən müharibəsi qəhrəmanı Adil İbrahimli və onun həyat yoldaşı Nargül İbrahimlinin ailə tarixçəsinə həsr olunmuş videoçarxı tədbir iştirakçılarının diqqətinə çatdırılıb.
